ନଦୀ ପାରି ପାଠପଢ଼ା, ଶଶିକୁଡ଼ି ଗ୍ରାମର ଗ୍ରାମବାସୀ ଙ୍କ ଜୀବନ ବିପଜ୍ଜନକ

କୋରାପୁଟ, ଜୁଲାଇ ୬ (ସିମାଦ୍ରୀ):
ଦଶମନ୍ତପୁର ବ୍ଲକ ଅନ୍ତର୍ଗତ ଶଶିକୁଡ଼ି ଗ୍ରାମର ଛାତ୍ରଛାତ୍ରୀ ପାଠପଢ଼ା ପାଇଁ ପ୍ରତିଦିନ ଜୀବନ ବାଜି ଲଗାଇ ନଦୀ ପାର କରୁଛନ୍ତି। ଏହି ଗ୍ରାମରେ ସ୍ଥାନୀୟ ସ୍କୁଲ୍ ନଥିବାରୁ ପିଲାମାନେ ୩ କି.ମି. ଦୂରରେ ଥିବା ବରଗଛ ଗ୍ରାମର ସ୍କୁଲକୁ ଯାଇଅଛନ୍ତି। ଖରା ଓ ଶୀତ ଦିନରେ ସେମାନେ ନିଜେ ନଦୀ ଅତିକ୍ରମ କରିପାରୁଥିଲେ ମଧ୍ୟ ବର୍ଷା ଆସିବା ସହିତ ନଦୀର ଜଳସ୍ତର ବଢ଼ିଯିବାରୁ ଏହା ଅତ୍ୟନ୍ତ ବିପଜ୍ଜନକ ହୋଇଯାଏ।

ଅନ୍ଧାରୀ ନଦୀ — ଏକ ଅପରିହାର୍ଯ୍ୟ ବାଧା
ଗ୍ରାମ ଆଗରେ ବହୁଥିବା ଅନ୍ଧାରୀ ନଦୀ ଉପରେ ଆଜି ପର୍ଯ୍ୟନ୍ତ କୌଣସି ପୋଲ ନିର୍ମିତ ହୋଇନାହିଁ। ବର୍ଷା ମୌସୁମ ଆସିଲେ ଏହି ନଦୀର ପାଣିର ଉଚ୍ଚତା ୪-୫ ଫୁଟକୁ ଉଠିଯାଏ। ଏପରି ଅବସ୍ଥାରେ ଛାତ୍ରଛାତ୍ରୀଙ୍କୁ ଅଭିଭାବକମାନେ କାନ୍ଧରେ ବହି ନଦୀ ପାରି ସ୍କୁଲ୍ ପହଂଚାଉଛନ୍ତି।

ମୌଳିକ ସୁବିଧା ପାଇଁ ୫ କି.ମି. ଯାତ୍ରା
ଗ୍ରାମରେ ୪୫ଟି ପରିବାର ବସବାସ କରୁଛନ୍ତି। ଶିକ୍ଷା ସହ ଉପଯୁକ୍ତ ସ୍ୱାସ୍ଥ୍ୟସେବା, ରାସନ ଉପଲବ୍ଧତା, ଓ ବଜାର ଯୋଗାଯୋଗ ପାଇଁ ଗ୍ରାମବାସୀମାନେ ପ୍ରତିଦିନ ନଦୀ ପାର କରି ୫ କି.ମି. ଦୂରରେ ଥିବା ପଞ୍ଚାୟତ କେନ୍ଦ୍ର ଓ ବ୍ଲକ୍ କାର୍ଯ୍ୟାଳୟକୁ ଯିବାକୁ ବାଧ୍ୟ ହେଉଛନ୍ତି। ଗର୍ଭବତୀ ମହିଳା ବା ଗୁରୁତର ରୋଗୀଙ୍କୁ ବି ନଦୀ ପାରି କରି ଡାକ୍ତରଖାନାକୁ ନେଯାଉଛନ୍ତି।

ପ୍ରଶାସନ ନିର୍ଲିପ୍ତ, ଗ୍ରାମବାସୀ ନିରାଶ
ପୋଲ ନିର୍ମାଣ ପାଇଁ ଗ୍ରାମବାସୀ ବର୍ଷାଧରି ଦାବି କରୁଥିବା ସତ୍ତ୍ୱେ ବ୍ଲକ୍ ପ୍ରଶାସନ ପକ୍ଷରୁ କୌଣସି ଦୃଢ଼ ପଦକ୍ଷେପ ନିଆଯାଇନାହିଁ। ଏହା ଗ୍ରାମର ଶିକ୍ଷା ଓ ସ୍ୱାସ୍ଥ୍ୟ ଉନ୍ନତିକୁ ଅଟକାଇ ଦେଉଛି।

ଜିଲ୍ଲା ପ୍ରଶାସନ ପ୍ରତି ଅନୁରୋଧ
ଗ୍ରାମବାସୀ ଏବଂ ଅଭିଭାବକମାନେ ଜିଲ୍ଲା ପ୍ରଶାସନ ସହ ବିଧାୟକଙ୍କୁ ଅନୁରୋଧ କରିଛନ୍ତି ଯେ ଅନ୍ଧାରୀ ନଦୀ ଉପରେ ଏକ ଦୃଢ଼ ବ୍ରିଜ୍/ପୋଲ ନିର୍ମାଣ କରି ସେମାନଙ୍କ ଜୀବନକୁ ସୁରକ୍ଷିତ କରାଯାଉ। ଏହା ଶିକ୍ଷା ଅଧିକାର ସହ ବାସ୍ତବ ଜୀବନ ସୁରକ୍ଷା ପାଇଁ ଅତ୍ୟାବଶ୍ୟକ।