ପୁଲିସ ଗାଡ଼ି ଭଙ୍ଗାରୁଜା, ୩ ଗିରଫ
ବୈପାରିଗୁଡା: ମହଙ୍ଗା ପଡ଼ିଲା ପୁଲିସ ଗାଡ଼ିକୁ ଭଙ୍ଗାରୁଜା କରିବା | ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ବୈପାରିଗୁଡ଼ା ପୁଲିସ।ସୂଚନା ଅନୁଯାୟୀ, ରାମଗିରି ଫାଣ୍ଡି ଅନ୍ତର୍ଗତ ପୁଟିଆଗୁଡା ଗାଁରେ ଦେଶୀ ମଦ ରନ୍ଧା ସହ ବିକ୍ରି କରାଯାଉଥିବା ନେଇ କୌଣସି ସୂତ୍ରରୁ ବୈପାରିଗୁଡା ପୁଲିସକୁ ଖବର ମିଳିଥିଲା। ପୁଟିଆଗୁଡା ଗାଁରେ ପୁଲିସ ପହଞ୍ଚି ମଦ ଭାଟିକୁ ଭାଙ୍ଗିବା ସହ ଭାଟି ମାଲିକକୁ ଗିରଫ କରି ଆଣୁଥିଲା| ତେବେ କିଛି ଲୋକ ପୁଲିସର କାର୍ଯ୍ୟରେ ବାଧା ସୃଷ୍ଟି କରିଥିଲେ। ପୁଲିସ ଗାଡ଼ିକୁ ଅଟକାଇବାରୁ ସେମାନଙ୍କୁ ବୁଝାସୁଝା କରାଯାଇଥିଲା କିନ୍ତୁ କିଛି ଯୁବକ ଉତ୍ତ୍ଯକ୍ତ ହୋଇ ପୁଲିସ ସହିତ ବଚସା କରିଥିଲେ | ପୁଲିସ ବାରମ୍ବାର ବୁଝାଇବା ପରେ ମଧ୍ୟ କିଛି ଯୁବକ ଉତ୍ତ୍ଯକ୍ତ ହୋଇ ପୁଲିସ ଗାଡ଼ିକୁ ଠେଙ୍ଗାରେ ଆକ୍ରମଣ କରିଥିଲେ । ଫଳରେ ପୁଲିସ ଗାଡ଼ିର ଆଗ ଭାଗ କାଚ ଭାଙ୍ଗି ଯାଇଥିଲା | ପୁଲିସ ଗାଡ଼ି ଭାଙ୍ଗିବା ଘଟଣାରେ ସନ୍ତୋଷ ବିଷୋୟୀ (୨୨), ଅଭି ବିଷୋୟୀ (୩୧) ଏବଂ ଉପେନ୍ଦ୍ର ବିଷୋୟୀ (୨୮)କୁ ଗିରଫ କରିଥିବା ବେଳେ ଆଉ କିଛି ଯୁବକ ଫେରାର ହୋଇଯାଇଥିବା ଜଣାପଡ଼ିଛି। ତିନି ଜଣଙ୍କୁ ଗିରଫ କରିବା ପରେ ଆଜି କୋର୍ଟ ଚାଲାଣ କରାଯାଇଛି।
Leave a Reply