ପୁଣି ମାତିଲେ ବାଇକ୍ ଚୋର
ବୈପାରିଗୁଡ଼ା : ବୈପାରିଗୁଡ଼ାରେ କିଛି ଦିନର ନିରବତା ପରେ ପୁଣି ମାତିଲେଣି ବାଇକ୍ ଚୋରା ଗତକାଲି ରାତିରେ ଜି.ମାଝୀଗୁଡ଼ା ପଞ୍ଚାୟତ ଅନ୍ତର୍ଗତ କଟ୍ରାଗୁଡ଼ା ଗ୍ରାମରେ ବାଇକ୍ ଚୋରି ହୋଇଥିବା ନେଇ ଥାନାରେ ଏତଲା ହୋଇଛି। ମାଛକୁଣ୍ଡ ଥାନା ଅନ୍ତର୍ଗତ ଜଡିଆମ୍ବ ଗ୍ରାମର ପତି ମାଣ୍ଡି (୩୦)ଙ୍କ ଶ୍ୱଶୁର କଟ୍ରାଗୁଡାରେ ରୁହନ୍ତି । ଗତକାଲି ପତିଙ୍କ ଶ୍ୱଶୁର କିଛି ଦିନ ଧରି ଅସୁସ୍ଥ ଥିବା ଖବର ପାଇ ନିଜ ସ୍ତ୍ରୀ ଏବଂ ଛୁଆକୁ ଧରି କଟ୍ରାଗୁଡ଼ା ପହଞ୍ଚିଥିଲେ। ଶ୍ଵଶୁରଙ୍କ ସ୍ଵାସ୍ଥ୍ୟବସ୍ଥା ଦେଖିବା ପରେ ଗତକାଲି ରାତିରେ କଟ୍ରାଗୁଡ଼ାରେ ରାତ୍ରିଯାପନ କରିଥିଲେ। ପରିବାର ଲୋକେ ସମସ୍ତେ ରାତ୍ରି ଭୋଜନ ସାରି ଶୋଇପଡ଼ିଥିଲେ। ଶୋଇବା ପୂର୍ବରୁ ତାଙ୍କ ବାଇକ୍ (ଓଡି- ୧୦କ୍ବ-୨୯୭୧)କୁ ଘର ଅଗଣାରେ ଚାବି ପକେଇ ରଖିଥିଲେ | ତାଙ୍କ ବାଇକ୍ ସହିତ ଅନ୍ୟ ଜଣଙ୍କ ବାଇକ୍ ମଧ୍ୟ ସେଠାରେ ରଖାଯାଇଥିଲା। ସକାଳୁ ଉଠି ତାଙ୍କ ବାଇକ୍ ଘର ଅଗଣାରେ ନଥିବା ଦେଖିବାକୁ ପାଇଥିଲେ | ବହୁତ ଖୋଜାଖୋଜି କରିବା ପରେ ମଧ୍ୟ ବାଇକ୍ ପାଇନଥିଲେ । ଚୋରି ହୋଇଥିବା ଜାଣି ବୈପାରିଗୁଡ଼ା ଥାନାରେ ଏତଲା ଦେଇଛନ୍ତି ପତି ମାଣ୍ଡି। ସୂଚନାଯୋଗ୍ୟ ଯେ, ଚଳିତ ମାସ ୧ ତାରିଖ ଦିନ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରୁ ଜଣେ ବାଇକ୍ ଚୋରି କରି ନେଉଥିବା ବେଳେ ଚୋରକୁ ଗ୍ରାମବାସୀ କାବୁ କରି ପୁଲିସକୁ ହସ୍ତାନ୍ତର କରିଥିଲେ । ପତି ମାଣ୍ଡିଙ୍କ ଏତଲାକୁ ଆଧାର କରି ତଦନ୍ତ ଆରମ୍ଭ କରିଛି ପୁଲିସ.
Leave a Reply