ମାଲକାନଗିରି, ମାଲକାନଗିରି ଜିଲ୍ଲା ସୀମାନ୍ତ ଅଞ୍ଚଳ ମୋଟୁ ନିକଟସ୍ଥ ଆନ୍ଧ୍ର ପ୍ରଦେଶ ର କାଲେରୁ ଗ୍ରାମ ସିଲେରୁ ଗତ ୩୦ ତାରିଖ ଦିନ ଜଙ୍ଗଲ ମଧ୍ୟରେ ଜଣେ ଅଚିନ୍ହା ବ୍ୟକ୍ତିଙ୍କ ମୃତଦେହ ମିଳିଥିବା ଘଟଣା ଉତ୍ତେଜନା ସୃଷ୍ଟି କରିଛି। ଏହି ଶବ କାଲେରୁ ଗ୍ରାମର ଏକ ଢ଼ାବା ହୋଟେଲ ପଛ ପଟ ଜଙ୍ଗଲ ମଧ୍ୟରେ ପଡିଥିବା ଦେଖି ଅଞ୍ଚଳବାସୀ ଚିନ୍ତୁର ଥାନାକୁ ସୂଚନା ଦେଇଥିଲେ।
ଖବର ମିଳିବା ସହିତ ଚିନ୍ତୁର ଥାନା ଏସଆଇ ଓ ତାଙ୍କ ଟିମ ଘଟଣାସ୍ଥଳକୁ ପହଁଚି ଶବ ଉଦ୍ଧାର କରି ମାମଲା ରୁଜୁ କରିଛନ୍ତି। ପ୍ରାରମ୍ଭିକ ତଦନ୍ତରେ ଜଣାପଡିଛି ଯେ, ମୃତ ବ୍ୟକ୍ତି ଜଣେ ପୁରୁଷ ଥିଲେ ଓ ଗାମୁଛା ବେକରେ ବାନ୍ଧି ଏକ ଗଛରେ ଫାସି ଦେଇଥିବା ଅନୁମାନ କରାଯାଉଛି। ସେ ଗୋଲାପୀ ରଙ୍ଗର ଟି-ସାର୍ଟ ଓ ଧୂସର ହାଫପ୍ୟାଣ୍ଟ ପିନ୍ଧିଥିଲେ। ମୃତଦେହର ମୁହଁ ଦୟନୀୟ ଭାବରେ ପଚିଯାଇଥିବାରୁ ତାଙ୍କ ପରିଚୟ ନିର୍ଣ୍ଣୟ ଅସମ୍ଭବ ହୋଇପଡିଛି।
ଚିନ୍ତୁର ଏସଆଇଙ୍କ କହିବା ଅନୁସାରେ, ଘଟଣାସ୍ଥଳରେ ଶବ ବ୍ୟବଛେଦ କରି ଶବକୁ ସମାଧି ଦିଆଯାଇଛି। ମୃତ ବ୍ୟକ୍ତି ସନ୍ଦର୍ଭରେ କୌଣସି ସୂଚନା ଥିଲେ କିମ୍ବା କେହି ତାଙ୍କୁ ଚିହ୍ନିପାରିଲେ ତେବେ ଚିନ୍ତୁର ଥାନାରେ ସଂଯୋଗ କରିପାରିବେ ବୋଲି ଅନୁରୋଧ କରାଯାଇଛି। ତାଙ୍କୁ ଚିହ୍ନିପାରିବା କିମ୍ବା ଗୋଟିଏ ନିଖୋଜ ବ୍ୟକ୍ତି ସନ୍ଦର୍ଭରେ ତଥ୍ୟ ଥିଲେ, ଚିନ୍ତୁର ଥାନାର ଏସଆଇଙ୍କ 9182609596 ନମ୍ବରରେ ସଂଯୋଗ କରିପାରିବେ।ପୋଲିସ ଏହି ମାମଲାକୁ ଗୁରୁତ୍ୱଦେଇ ତଦନ୍ତ ଜାରି ରଖିଛି।